މި ސަރުކާރުން ފުވައްމުލަކަށް ކުރި އެއްވެސް ކަމެއް ފެންނާކަށް ނެތް: ފައިސަލް

މި ސަރުކާރުގެ ތިން ވަނަ އަހަރަށް އެޅިއިރު، ފުވައްމުލަކުގެ ތަރައްގީއަށް މި ސަރުކާރުން ކުރި ކަމެއް ފެންނާކަށް ނެތް ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.

"މިޅި ރަށޮ ތެލަފަތަހަ" މި ނަމުގައި މިސްކިތްމަގު އަވަށުގައި ހުންނަ އެމްޑީޕީ ހަރުގޭގައި ރޭ ބޭއްވި ކެމްޕޭން ޖަލްސާއެއްގައި ވާހަކަ ދައްކަވަމުން ފައިސަލް ވިދާޅުވީ މި ސަރުކާރުން ބިންގާ އެޅި މަޝްރޫއުތަކުގެ މަސައްކަތް ކުރިއަށް ނުދިޔަޔަސް އެމްޑީޕީ ސަރުކާރުން އެ ރަށަށް ގިނަ ކަންތައްތަކެއް ކޮށްދީފައިވާ ކަމަށެވެ. އެގޮތުން ޑަޔަލިސިސްގެ ހިދުމަތް ތައާރަފްކޮށް ފުވައްމުލަކު ހޮސްޕިޓަލުން ލިބޭ ޚިދުމަތްތައް އިތުރުކޮށްފައިވާނެ ކަމަށް ފައިސަލް ވިދާޅުވި އެވެ.

އޭގެ އިތުރުން މި ރަށުގައި ނުހެދި ހުރި ގިނަ މަގުތަކެއް ޒަމާނީ ފެންވަރަށް ހަދައި ތާރު އަޅާފައި ވަނީ ވެސް އެމްޑީޕީގެ ސަރުކާރުން ކަމަށް ފައިސަލް ވިދާޅުވި އެވެ. ފުވައްމުލަކު ރަށްގިރުމުގެ މައްސަލައަށް ދާއިމީ ހައްލު ގެނައުމުގެ ގޮތުން އެރަށް ވަށައި ބޮޑު ހިލަ ޖެހުމުގެ ބިޔަ މަޝްރޫއު ފަށައި ނިންމާލީ ވެސް އެމްޑީޕީ ސަރުކާރުން ކަން ފައިސަލް ފާހަގަ ކުރެއްވި އެވެ.

ފައިސަލް ވިދާޅުވީ މި ސަރުކާރުން ފުވައްމުލަކަށް ކުރި އެއްވެސް ކަމެއް ފެންނަން ނެތަސް އެމްޑީޕީ ސަރުކާރުން ކޮށްދިން ކަންތައްތައް ރައްޔިތުންނަށް ފެންނަން ހުންނާނެ ކަމަށެވެ. އަދި އެމްޑީޕީން ނުވާނެ ކަންތައްތަކުގެ ވާހަކަ ނުދައްކާނެ ކަމަށާއި ނިމިދިޔަ ފަސް އަހަރު އެކަން ސާބިތު ކޮށްދީފައި ވާނެ ކަމަށް ވެސް ފައިސަލް ވިދާޅުވި އެވެ.

އާސަންދައިގެ ހިދުމަތް ލިބުމުގައި ދަތިތަކެއް ހުރި ކަމުގެ ޝަކުވާ ގިނަ ރައްޔިތުންގެ ފަރާތުން ލިބެމުން އަންނަ ކަމަށާއި ފެންނަމުންދަނީ ދައުލަތުގެ ބައިތުލްމާލު ހުސްކޮށް ގައުމު އިނދަޖައްސާލާ މަންޒަރު ކަމަށް ވެސް ފައިސަލް ވިދާޅުވި އެވެ.

އެހެންކަމުން ކުރިއަށް އޮތް ލޯކަލް ކައުންސިލް އިންތިހާބުގައި ރައްޔިތުން ވޯޓު ދޭންވީ އެމްޑީޕީގެ ކެންޑިޑޭޓުންނަށް ކަމަށް އެމަނިކުފާނު ވިދާޅުވި އެވެ.

ފައިސަލް ވަނީ ފުވައްމުލަކުގެ މޭޔަރު ކަމަށް ދެވަނަ ދައުރަކަށް ވާދަކުރައްވާ އިސްމާއީލް ރަފީގާއި ސިޓީ ކައުންސިލްގެ މެންބަރު ކަމަށާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް ވާދަކުރައްވާ ކެންޑިޑޭޓުންނާއެކު ދޮރުން ދޮރަށް ވަޑައިގެން ކެމްޕޭންގެ ހަރަކާތްތައް ކުރިއަށްގެންދަވާފަ އެވެ.