ފުވައްމުލަކުން އެތައް ގަޑިއިރަކަށް ކަރަންޓު ކެނޑުން: ގިނަ ބަޔަކަށް ބޮޑު ތަކުލީފެއް!
ފުވައްމުލަކުގައި ކަރަންޓުގެ ހިދުމަތް ދިނުމަށް ފެނަކަ ކޯޕަރޭޝަނުން ހިންގާ އިންޖީނުގެ.
އަބްދުﷲ ޖަމީލު📷
ފުވައްމުލަކުގައި ކަރަންޓުގެ ހިދުމަތް ދިނުމަށް ފެނަކަ ކޯޕަރޭޝަނުން ހިންގާ އިންޖީނުގެ.
އަބްދުﷲ ޖަމީލު📷
ފުވައްމުލަކުގެ ބޮޑު ސަރަހައްދަކުން ކަރަންޓުގެ ހިދުމަތް މިއަދު ކެނޑުމުން ތަކުލީފަކަށް ވެގެން ގިނަ ބަޔަކު ޝަކުވާކޮށްފި އެވެ.
މި ރަށަށް ކަރަންޓުގެ ހިދުމަތް ދޭ ފެނަކަ ކޯޕަރޭޝަނުން 8 ސަބްސްޓޭޝަނެއް ހިމެނޭ ސަރަހައްދުން ކަރަންޓު ކަނޑާލީ މިއަދު ހެނދުނު 9:30 ހާއިރު އެވެ. އަދި އަލުން ކަރަންޓު ދިނީ މެންދުރު ފަހު 2:00 ހާއިރު އެވެ.
އެންމެ ހޫނުގަދަ ވަގުތާ ދިމާކޮށް ފެނަކައިން ކަރަންޓުގެ ހިދުމަތް ކަނޑާލުމާ ގުޅިގެން ރަށުގެ ގިނަ ވިޔަފާރިތައް ހުއްޓުމަކަށް އައިސް އާއްމުންނަށް ވެސް ގޭގައި އެއްވެސް ކަމެއް ނުކުރެވި އެތައް ގަޑިއިރެއް ބޭކާރުވެގެންދިޔަ އެވެ.
"ފެނަކައިން ކަރަންޓު ކަނޑާލާކަމުގެ ނޯޓިސްއެއް ނެރެނީ ވައިބާ ގްރޫޕަކަށް. މި ގްރޫޕްގައި ތިބޭ ބަޔަކަށް ނޫނީ ނޭނގޭ މިކަމެއް. މިހާ ޒިންމާދާރުކަން ކުޑަކޮށް މިކަން ކުރުމުން އެތައް ހާސް ބަޔަކު ތަކުލީފު އުފުލަން ޖެހޭ،" މިރަށު ދޫނޑިގަމު އަވަށު ކެފޭއެއް ހިންގާ މީހަކު ބުންޏެވެ.
އޭނާ ބުނީ ކަރަންޓު ބިލް ތައްޔާރުވި ކަން އެސްއެމްއެސްއަކުން އަންގާ ގޮތަށް ކަރަންޓު ކަނޑާލާކަމުގެ ނޯޓިސް ފޮނުވޭނެ ކަމަށެވެ. އަދި މައުލޫމާތެއް ސާފުކުރަން ނޯޓިސްގައިވާ ލޭންޑްއަކީ ބޭނުން ނުކުރާ ނަމްބަރެއް ކަމަށް ވެސް އެ މީހާ ބުންޏެވެ.
"ފެނަކަ އިން މި ރަށަށް ދޭ ކަރަންޓުގެ ހިދުމަތް ކުއްލި ނޯޓިސް ދީ ކަނޑާލުން މިހާރު އާއްމު ކަމަކަށް ވެއްޖެ. މިކަން ހައްލުވާނެ ދުވަހެއް ވެސް ނާދޭ،" އޭނާ ބުންޏެވެ.
ފެނަކަ ކޯޕަރޭޝަނުން ދެމުން އަންނަ ކަރަންޓު ހިދުމަތް ދޭތެރެ ދޭތެރެއިން އެތައް ގަޑިއިރަކަށް ކަނޑާލަ އެވެ. މިއަދު ރަށުގެ ބޮޑު ބަޔަކުން ކަރަންޓު ކަނޑާލީ ހައިވޮލްޓޭޖް ނެޓްވޯކު އަޕްގްރޭޑްކުރުމުގެ މަސައްކަތް ކުރުމަށް ކަމަށް ބުނެ އެވެ.
މި ލިޔުމަށް އަދި ކޮމެންޓެއް ނެތް. ފުރަތަމަ ކޮމެންޓު ލިޔުއްވާ!